豬心記者：由Jayden到Daddy Mami

每代都有流行的中、英文名字。身為做超過二十年的教育記者，入學校見到所有人名表，英文名必有Jayden、Anson、Charlotte、Hailey等等。中文名更妙，不同寫法的「希妍」、「姸希」， 近數年傾向韓國偶像名字也很多！

我最大疑問是自從有社交媒體之後，不少家長頭像用小朋友相，稱呼自己「XX Mami」 「XX Daddy」。

現實世界都一樣。只要採訪活動：教育中心、NGO，甚至學校，我都聽到不少職員稱呼家長：（ 中/英文名）媽媽/爸爸。何時開始，不是稱呼「X太」、「X生」？

採訪家長時，問對方「點稱呼」，一般都回答X太、X女士，或乾脆用英文名。若媽媽告訴我姓陳，我都會確認一次，「是陳太？」 

但，用小朋友名+爸爸/媽媽；或陳媽媽/爸爸，我都會想：「點解我有父母，我要叫你爸爸/媽媽？」（ 笑 ）在現實場景，為何要稱呼家長做XX爸爸/媽媽呢？如果對方已離婚，用XX媽媽都可以接受。問過幼稚園校長、教育中心的負責人⋯⋯

「 新世代家長離婚率好高，亦有好多根本冇結婚，所以，唔可以叫X太。我哋有試過被投訴，職員見到小朋友姓氏，對方接放學叫咗X太，我哋總部即時收到email投訴，所以，以後所有center都會全部稱呼XX媽媽。」 某NGO負責人曾這樣答我。

「 呢代啲媽媽覺得叫X太好老套，就算幼稚園一齊玩嘅group啲Mami ，大家都係咁叫。」某私營機構導師回覆。

「 我哋幼稚園早年係老夫少妻，中港婚姻家長，好多小朋友入學時有媽媽，畢業時冇媽媽⋯⋯ 亦好多媽媽，有兩個小朋友不同年份入讀，兩年抱兩、三年抱兩，小朋友姓氏都不同，用小朋友名+媽媽/家長稱呼，最穩陣！」某退休幼稚園校長剛剛與記者閑聊如是說。

（原載於作者threads @piggy_reporter，題為編者所擬）