梁重皿：願仍然受苦的學生有人看見

開學一星期，已經有學生走到生命盡頭。每一宗悲劇背後，都有一個家庭承受全難以言喻嘅傷痛。我哋可以悲痛，同時做多一步。面對接二連三嘅悲劇，我哋自然會問：「點解會發生？」「我哋可以做啲乜？」我哋未必可以預防每一件事，但可以早一點發現一個學生嘅改變。

開學，本來應該係一個重新開始嘅時間。但對一啲學生嚟講，重新適應學業、人際關係、家庭期望同生活節奏，亦可能帶來好大壓力。自殺危機未必一定係喊得好犀利、情緒崩潰，先叫做「有事」。有啲學生仍然返學、交功課、同人講笑，但可能已經慢慢變得唔似平時嘅自己。

唔好只係留意「佢有無喊」，開學初期、焦慮、攰，唔想返學、情緒波動，都可以係適應過程。真正值得留意嘅係：「佢有無變得唔似自己？」尤其係明顯、突然、持續嘅改變：

▍突然變得異常平靜：

一個平時好焦慮嘅學生，突然變得異常平靜：「算啦」、「乜都無所謂」。唔代表一定有危險，但值得停低問多一句。

▍突然乜都唔在乎：

以前好在意成績、朋友、興趣，突然變成「唔緊要」、「點都得」、「唔想理」。唔好只係當佢「懶咗」，可以問：「你係無咁在意，定係覺得乜都無意思？」

▍表面正常，生活卻開始變：

佢可能仍然返學、交功課、同人講笑，但同時出現：睡眠／食慾明顯改變、突然孤立自己、長期疲倦、情緒大幅波動。「仲返到學」唔等於「一定無事」。

▍聽到「消失」嘅信號：

「我想消失」、「如果我唔喺度就好」、「死咗咪唔使煩」。唔好急住否定，可以直接、平靜咁問：「你有無諗過傷害自己？」如果有，唔好一個人處理，盡快尋求專業支援，並確保佢有人陪伴。

最重要嘅：學生嘅危機無一個標準，所以，比起問：「佢有無自殺警號？」不如問：「佢最近，有無變得唔似自己？」我哋未必可以阻止每一場悲劇，但可以令一個學生早一點知道：「有人留意到你。」「你唔需要一個人捱。」

「我留意到你好似有啲唔同。」

「如果你想講，我會喺度。」

一句說話，可能就係一個人願意再求助一次嘅開始。

願離開嘅安息。亦願仍然受苦、仍然努力生活嘅學生，有人看見，有人接住。

（原載於作者IG，題為編者所擬）

☎️ 香港情緒及自殺危機支援

• 生命熱線 Suicide Prevention Services
24小時預防自殺熱線：2382 0000

• 香港撒瑪利亞防止自殺會
24小時情緒支援熱線：2389 2222

• The Samaritans Hong Kong
24小時情緒支援熱線：2896 0000

• 醫院管理局｜精神健康專線 Mental Health Direct
24小時精神健康支援：2466 7350

• 香港撒瑪利亞防止自殺會｜同理frd・陪你聽
適合擔心身邊青少年有情緒困擾／自殺危機嘅朋友及親友：
電話 2389 2227｜WhatsApp 5779 7356
服務時間：每日 下午4時至凌晨2時

⚠️ 如果你或身邊嘅人正處於即時危險，或有即時傷害自己嘅風險，請立即致電 999，或前往最近嘅急症室。