職安教育相片展：職安真漢子的危險日常

今日勞動節，大家平日有冇留意，其實工人每日喺工作場所面對好多挑戰？工業意外不時發生，大型棚架倒塌壓傷多名工人、泥頭車司機頭部被夾、清潔工搬運廢棄物時遭壓傷等，相信大家仍有印象。近日有職安教育相片展透過影像、嗅覺和聽覺體驗，讓大眾感受在工人日常背後的危險和壓力，希望藉此引起公眾對職業安全的關注。

▍ 不單只勞工 人人都應有職安意識

展出的照片看似平平無奇，只是工人的日常寫照，但他們的工作環境裡面，其實暗藏危險。「我哋日常生活都會見到呢啲嘢，但問題係我哋見到，應該要做啲咩？應該要有咩反應？」工業傷亡權益會（下稱工權會）舉辦職安教育相片展，透過觸目驚心的照片，讓人反思勞動工作的危險。

工權會幹事劉家樂指著照片〈對死神藐視的笑容〉分享背後的故事。照片攝於去年11月土瓜灣棚工意外現場，當日有棚工在11樓拆棚架時發生意外，連人帶「狗臂架」一同墮下，傷重不治。劉家樂與工權會總幹事蕭倩文到場了解，「我哋擰轉頭一望，就見到第二個棚有師傅就咁爬上去準備做嘢，我哋即刻喝停佢。」當時那位棚工沒有佩戴任何安全裝備，打算徒手爬上棚架工作。

▍ 勞工缺乏安全意識 寧棄安全為趕進度

劉家樂指出，那可能是行業特性問題，尤其是棚工，一日要搭六、七個棚架，「好趕時間，『劈住去』搭......所以佢哋諗好點搭就會直接做。」愈趕時間便愈容易錯，但工人出錯，不單是被上司斥責幾句，更有機會釀成意外，甚至喪命。劉家樂強調安全知識和意識同樣重要，很多勞工都有基本安全知識，卻沒有安全意識，寧願捨棄安全，追趕工作進度。

「好多時我哋（對職業安全）嘅推進，就係靠血肉、靠人命嚟推，我覺得咁樣唔ok。」劉家樂認為，雖然每次出現工業事故後，大眾都會熱烈關注職安問題，但過了一陣子，大家又再度忽視職業安全的重要。

近年工權會開始積極到校園和社區推廣職業安全教育，希望不單只勞工，而是市民大眾都能擁有安全意識。「佢今日係學生，聽日可以係地盤工人、工程師、建築師、發展商老闆。」劉家樂認為，每個人在不同崗位上也有機會面對職業安全問題；擁有足夠的安全意識，能減少工業意外發生，拯救一條生命。

▍ 倡議設立紀念日及紀念碑 警惕社會關注職業安全

工權會倡議政府成立「4.28工殤紀念日」至今已經三十年，亦請政府於市區設置工殤紀念碑，肯定工人對建設社會的付出和犧牲，然而政府一直未有行動。「紀念碑除咗讓大家紀念佢哋，更加警惕住我哋，未來嘅社會發展應該將安全放喺第一位。」劉家樂認為是次展覽也有警惕大眾和紀念工人的用意，但長遠來說亦應有一個永久的紀念碑去記住這些故事的血肉。

文：Betsy

【載傷．言殤】職安教育相片展

日期：即日至5月20日

時間：7am至11pm

地點：美荷樓青年旅舍地下