傳道人公開試曾考零分 籲學生放膽試喜歡做的事

今日係DSE放榜，你身邊有無朋友，因為「考得唔好」而彷徨？呂宇俊傳道曾經在會考「攞0分」，之後重考並入讀大學。他鼓勵考生「唔好畀人睇死」。

當你分享自己的夢想而別人叫你「算吧啦」，「如果嗰個人戴眼鏡，你就叫佢跌眼鏡；如果佢唔戴眼鏡，咁就要佢戴返眼鏡！」呂宇俊說，不要將自己的命運交託給別人手上。

▍  學校能讓孩子感到「我在飛！」嗎？

「放榜」是中學一年一度在媒體曝光的日子，但呂宇俊認為，成績只是結果，孩子的學習過程卻很少受到公眾注視，例如他們享受、投入的活動。他最近看的賽車電影《F1》中，主角很享受揸車，朋友說「他在飛！(he’s flying)」這令他反思，多少學子感到自己「翱翔」？

如果有夢想，而只是遇到困難，呂宇俊說「唔好將自己命運交畀人」，最重要是了解自己想要甚麼，為自己而進步。譬如他認識一個中三女生，中一開始吹長笛、加入管弦樂團，中途遇過困難，現在卻很自信。當他問她為何是長笛？她就說：「唔係我揀長笛㗎，係長笛揀咗我」。

如果有人不知道自己喜歡做甚麼，他建議可以先回想兒時喜歡的事，「因為好多時（喜好）畀父母抹殺咗」；如果仍然無從入手，就不妨放膽去試。曾有一個不願返學的男孩，當呂宇俊知道他喜歡用混音器，就帶他到一個錄音房，見識一個完整的混音器。如果在公開試感到打擊，呂宇俊覺得「唔開心一陣無所謂，但唔好覺得無機會，仲有機會、仲有好多機會。」

▍  「所有科肥晒，都只係滿足唔到讀大學最低要求啫」

呂宇俊指出，「放榜」這個詞語跟中國科舉制度相關，以前科舉是「終極」，考到可以做官，考不到就要「返鄉下耕田」，「一係得一係唔得」，但DSE的本質並非如此，即使問ChatGPT，它也知道只是「滿足唔到讀大學嘅最低要求」。

外國打工不一定要讀大學，即使是清潔、指揮交通，都受人尊重、人工不低。「學一門手藝，攞個水喉專業資格，有時更加實際」。呂宇俊說，何況有時「出嚟做幾年工，先見到讀書畀到自己嘅嘢」。他認識一個學整車的年輕人，從不覺得讀書有用，但有次師傅升高一架車讓他看車底，指出計算氣流的數學有用，又問年輕人是否「想成世用勞力？」令他明白讀書都有用。呂宇俊認為，如果你不明白為何要讀書，點講都無用，但只要「揾啲嘢學」不斷經歷，不知哪天可能想再讀書。

即使有些人讀上大學，甚至考到一級榮譽，呂宇俊覺得他們「好多時剩係讀書叻」，全副精神放在考試，反而不懂跟人溝通。他認為，團體生活，例如教會團契、童軍等很重要，但現在連中文科口試都取消，「咁去邊度訓練學生講嘢？」他又指，家長有時跟孩子說「讀書係你責任」，然後不需要參與課外活動、做家務。他質疑，這是否真的對孩子好？若看老闆聘請甚麼人，就知道觀察別人反應、跟人傾偈、同理心，都是重要的能力，卻未必跟讀書成績有關。

文：Jon