MIRROR演唱會意外發生後，唔少教會信徒教牧都關心事件，又一同轉發代禱消息。但亦有人批評轉發消息、相關報導、代禱內容入面，成日強調傷者係「牧師個仔」，認為唔合適。甚至有人話，情況反映部份基督徒滿口大愛，但對關心對象就好揀擇。

舞蹈員李啟言（阿Mo）之前喺MIRROR演唱會中受傷，至今仍然喺深切治療部留醫，情況危殆，維生指數穩定。佢爸爸李盛林牧師噚日由加拿大抵港，獲恩恤安排到醫院探佢。李盛林話喺過去幾日，詩篇廿三篇的經文安慰了他和家人。

MIRROR演唱會發生舞台意外，唔少人都經歷創傷。基督徒藝人張敬軒凌晨喺IG表示，事故發生後聯絡專業輔導顧問義工團隊，向各位有關職員無償提供心理輔導同埋情緒支援，「過程當中一切盡是team work」。