流散者們：久違嘅心痛

好耐無探露宿者，無諗過環境變咗咁多——變到唔當班街坊係人。

瞓係火車橋嘅阿姨叔叔，一個有屋企人間唔時照顧吓，另一個有津貼上樓，但分別因為各自原因返咗橋瞓。呢個係佢哋嘅個人選擇，定係大環境底下嘅唯二出路？一係瞓街，一係唔瞓街但生活更加艱難。人人都有自己嘅故事，但又有咩人願意聆聽露宿者嘅故事？

落到隧道就開始嬲，居然封路！單邊封路完全係有針對性，大費周章咁封咗隧道一半地方，將本來瞓咗好一段時間嘅無家朋友統統趕走。就算嗰度唔係佢哋嘅家，嗰度都係佢哋瞓覺、休息、存放個人物品嘅一個空間。呢個城市為咗講好某種故仔，係可以毫不留情咁樣將小人物嘅生活空間扼殺。佩服，佩服。

但最離譜嘅係球場看台。因為以前都有去開嗰邊，所以一睇就知龍門搬咗位。我喺度諗，點解無啦啦搬龍門？本身係踢一個大場，而家變咗兩個細場。再望一望龍門位置，恍然大悟，原來係刻意放喺看台正前方⋯⋯唔通真係方便觀賽？係要令到露宿者唔方便喺度瞓啊！到底心地有幾差先會諗到咁樣嘅方法去迫遷？

好耐未試過咁激動。我嬲，我失望，但我唔甘心。就算呢個社會就係咁差、咁冇得救，我哋係咪可以做少少嘢，令到呢個世界裡面有少少人，生活有少少唔同呢？

28/3 7:00我會同朋友再去探，社會結構未必即刻有改變，但關心街坊係實際嘅。時間夾到可以一齊，旺角出發。如果唔得，我打算籌募物資，睇吓有無嘢回應？

- 旺角/大角咀嘅飯票（餐廳拎飯）

- 或者 PayMe 集資買物資

希望有50個有心人，每人夾$20就夠

一班有心人出少少力 > 一個人出好多力

有心想做啲嘢回應嘅，可留言或DM。

（原載於作者專頁）