伍家豪：因為詩歌而分裂，歷史上三次崇拜戰爭

以聖詩為主體嘅爭論角度，歷史上最少出現三次，第一次係馬丁路德改教之後，要求當時教會嘅聖樂開放畀信徒參與唱頌，由於當時只係得專業詩班可以參與崇拜唱歌，所以有文獻指出，當時有好多教會詩班反對將音樂下放畀非專業嘅人唱，認為係侮辱上帝，所以地區執行上，唔係間間教會平信徒都可以唱歌。簡單講第一次崇拜戰爭，就係認為音樂美學係絕對嘅尺，上帝只喜歡具質量嘅音樂。

第二次崇拜戰爭，出現喺大約十八、十九世紀，當時出現大量福音詩歌（其實即係而家所謂嘅傳統詩歌），當時唱開metrical psalm或者再古老詩歌嘅教會，就覺得呢啲當代詩歌難登大雅之堂，所以亦都造成世代之爭。簡單講，第二次崇拜戰爭亦都係當代與當時傳統之間嘅拉扯，而當時部份教派處理崇拜戰爭嘅做法就係出詩集，將神學紮實嘅當代詩歌收錄，減低部份宗派教會因為神學緣故而不使用當代詩歌嘅憂慮。

所以詩集嘅出現，其實係希望當代創作能夠進入崇拜，一方面去蕪存菁，留低質素較高嘅作品，另一方面想解決因為詩歌出現嘅紛爭。點知呢一本為解決崇拜戰爭而出現嘅詩集，一百年後又成為下一代崇拜戰爭嘅籌碼。第三次崇拜戰爭大約係出現喺靈恩運動第三波之後，當時當代短詩大量推出，再加上葛培理大力推行以當代詩歌成為佈道工具，所以吸引到唔少人擁抱當代詩歌。

咁唱開傳統詩集嘅人，自然又會覺得被當代詩歌入侵。其實，詩歌嘅功能係幫助人敬拜上帝，上帝係昔在今在永在的全能者，所以信徒透過當代產物與上帝相遇，神學上係冇問題嘅。如果唱現代詩歌嘅問題係輕易放棄傳統，咁樣積極介紹同分享傳統好嘅地方俾當代人就可以，而唔係擁抱傳統而放棄當下。

喺聖詩神學上，沒有一類音樂叫基督教音樂，只有基督教歌詞，因為呢個世界萬有都屬於上帝，任何音樂配上基督教歌詞都能夠被上帝所用，所以唔需要幫上帝代言，話上帝只喜歡A唔喜歡B。當然唔喜歡同你唔同教派嘅主張，嗰啲神學係可以另外討論。

只係對我嚟講，呢一種重複歷史錯誤，強調自己喜好立場就代表同你唔同嘅嘢一無是處，呢一種講法係崇拜戰爭嘅復辟。我哋下一代係聽抖音嘅，都好值得問，當世代再改變嘅時候，我哋嘅敬拜觀其實係咪仍然集中喺神學上，而唔係喺形式上。

（原載於作者FB，經編者節錄）