絮絮：I Give myself Away

我本身係基督徒，日前參與了大埔祈禱會。當晚進入會場前都曾帶住一絲疑惑，咁樣會唔會單純為自我感覺良好？街坊網民見到會唔會覺得好離地好平行時空？但完咗成晚之後我有好唔同嘅領悟。

我哋係基督徒之外，都係香港人。喺我哋呢群人入面都有人喺事件中受災，或者直接認識死傷／受影響居民。就算唔係，大家作為香港人都一齊經歷今次嘅集體創傷，感到傷痛、憤怒甚至絕望。

一齊祈禱、敬拜係創造一個哀悼嘅空間，容許心底嘅情緒抒發出嚟。當中好重要嘅係宣告神嘅同在、神嘅著緊、神嘅憐憫、神嘅公義同審判，讓我哋嘅情緒能夠被安慰。

咁你問：被安慰之後呢？

重點來了：我自己同許多在場嘅人，其實都各自有其他崗位。淨係計我認識嘅人已經有社工、老師、傳道人、NGO領袖、學生等等，仲未計呢幾日大家義務幫手嘅角色。

我唔知大家有無經歷過，喺呢啲崗位默默努力回應，予人以支持係需要幾強大嘅心臟。加上火災揭露嘅黑暗之巨大，實在太容易撲滅心中僅餘嘅光。（呢個係呢幾日喺教外嘅朋友口中都聽到嘅感受同敘述。）

當大會帶領最後一首詩歌〈I Give myself Away〉嘅時候，我瞬間明咗：我哋要先經歷安慰，重新收到、收穩對憐憫同公義嘅盼望，先會有足夠心力繼續去做實事。

基督信仰嘅核心，係神對世界嘅救贖。喺仍然受罪轄制嘅世界中，呢個係一份持續進行、on-going嘅使命。並且，神邀請我哋同佢一齊，與經歷苦難嘅人一同受苦（compassion），亦一同以行動修復因罪而破損嘅世界（co-work to bring shalom）。

敬拜禱告喺呢刻至關緊要，既係直接宣告神在黑暗猖獗之際仍然工作，亦係宣稱我哋企係神嗰邊——既然我哋宣告神深愛和顧念每一個受災者，咁呢份愛理應驅使跟隨主嘅我哋，以行動去陪伴、照顧、慷慨分享。既然我哋嘅神係聖潔又恨惡惡事，咁我哋必然要指正並堅拒詭詐和貪婪、罔顧生命的人和事。一同敬拜除咗make a statement，更係整個群體一同轉向神，以致持續地心意被聖靈更新而變化，加入在神修補醫治世界的工作當中。

（標題為編者所擬）