活世信徒：情緒價值

近排發現當講起人同人嘅相處之道
除咗互相尊重，體諒同明白
仲多咗一樣就係 情緒價值
無論係情侶 朋友甚至家人
溝通裏面都好似好需要情緒價值

情緒價值
又可以講係情緒上嘅支持
感受上嘅理解同認同
可能呢樣嘢包括咗好多
有同理心、明白、體諒、
接納、包容同肯定等等
或者簡單啲講 其實呢啲嘢都係
人係關係裏面嘅一啲basic needs

呢啲basic needs一直都好重要
但點解好似近年我哋突然多咗表達
對呢啲嘢嘅需求？
甚至整咗個專有名詞
去突出呢啲野嘅重要性？

可能的確近年社會發生嘅好多事
都令我哋漸漸累積咗好多情緒
而當壓抑過後 我哋都好需要
透過表達去release一啲感受
正正因為大家係過程中
學習多咗點樣去認識同埋表達自己嘅情緒
所以更明白到情緒上嘅支持係好重要

當然呢樣野係好的
可以令人同人之間多咗一份體諒同明白
不過同時如果過份推崇情緒價值嘅時候
可能都反映緊我哋內心嘅一啲態度

或者我哋強調需要情緒價值嘅時候
其實都表達緊希望被看見同明白
不過當過份咗嘅時候
就會發現呢份執着
可能係源自於我哋嘅自我
希望別人可以畀到
我哋想要嘅安慰同認同
回應到我哋內心嘅孤單
同肯定我哋嘅價值
但其實真正回應呢啲嘢嘅
最終源頭係上帝

當我哋只係著眼係自己嘅情感需要
而唔想去接收對方真誠嘅回應嘅時候
慢慢耐咗
可能我哋只會想同
畀到完全支持同安慰嘅人相處
放棄一啲本來互相扶持大家成長嘅關係
只剩下互相包紮、擁抱
一齊留喺安舒區嘅人
失去咗關係本來珍貴之處

其實真正寶貴嘅關係係咩？
係情緒價值？係無盡嘅安慰？
定係可以陪伴大家成長
一齊面對挑戰同見證人生轉變
當然情緒支持同認同好重要
不過可能學習去聆聽同擁抱別人嘅提醒
先可以帶俾我哋生命上更大嘅得著

「唯用愛心說誠實話，凡事長進，連於元首基督。」（以弗所書4:15）
或者真正嘅屬靈友誼
唔應該只係停留於情緒價值
只係單純希望別人企係自己嗰邊
甚至想別人跟隨自己嗰套
而係大家一齊學習放下己見
聽下對方諗法背後嘅感受同原因
一齊搵出解決問題嘅方向
可能咁先係建立緊真正嘅屬靈群體

願我哋能夠成為別人嘅屬靈朋友
學習放下唔同嘅立場同情緒
去謙卑接納他人嘅意見
互相建立

（原載於作者IG）