whoami：我的放榜回憶

諗返起幾年前DSE放榜，都會好似一般考生夜晚瞓唔著。記得嗰時最驚自己嘅英文唔合格，考完試嗰排成日發惡夢，夢見英文唔合格，入唔到大學，至於其他科就都有信心。喺嗰忐忑不安嘅一兩個月，個心都好唔平安。直至有一次敬拜入面，有句歌詞係從天父角度講：「Dear Child, Don’t be afraid! 」我從嗰刻起就冇咁驚。

到放榜嗰日，同學通常一拎到成績表先知道自己嘅成績，但我就唔係咁樣。我一返到學校見到學校老師，佢就同我講：「恭喜你！你入到大學！」所以我嗰刻就知道自己嘅英文係合格。有一個好好笑嘅位，就係一返到學校，經過教員室嘅門口，個個老師都喺度爭住睇大家嘅成績表，氣氛都幾熱鬧。雖然我其他科嘅成績無預期中咁好，可能差咗一兩分，但係個心都平安嘅！

睇到其他同學，有人主科唔合格，有人選修科唔合格，最後要讀基礎文憑或者副學士。自己企喺佢哋隔離都有啲尷尬，如果行過去安慰佢哋，又好驚俾佢哋話：「你都唔明我！」但又好想安慰佢哋。

而家過咗幾年，我卻見到呢啲同學都喺唔同嘅地方綻放緊佢哋嘅光芒：有一部份人已經成功入讀「八大」，亦都有部份人從自己嘅興趣入手，從事了佢哋鍾意嘅行業，好似化妝、運動甚至拍片等等。喺呢幾年入面，我真係發現「條條大路通羅馬」，有人好似要兜多一兩個彎，但最後都去到佢哋想去嘅地方。所以DSE放榜同學仔，無論你今日個分係點，都唔好放棄，因為原來點都有方法去行自己嘅路！