Pastor S：露宿朋友走得去邊？

尋晚同朋友食飯，打風前夕，心血來潮，食完就去探開嘅地方走走，提提露宿朋友嚟緊10號風球。佢哋有啲無電話，朋友又無幾個，都真係唔知幾時打風。

入公園，落隧道，同佢哋講打風啦，快啲去庇護中心。有啲街坊竟然話唔走！「走得去邊？」同清場個次聽到嘅，同出一轍。去避幾晚，返到嚟可能連瞓嘅位都無埋。

隧道口無緣無故多咗好多垃雜嘢，以為係拾荒者執嘢擺住先，點知係相識嘅無家朋友帶嚟嘅。原來佢搬咗呢個位瞓，但就唔知點解多咗咁多嘢。佢話呢啲都係佢最近收集嘅，打風帶唔走，咁就唔走！講到明連招牌都吹得跌，佢依然坐係龐大嘅囤積物中間，一臉從容自若。可能比起人身安全，佢更在乎家當、呢個「家」吧。

我同朋友力勸不果，唯有祝福一切平安。我哋當然想佢哋去安全地方暫避，但每個人都有選擇嘅權利——我哋唔係老奉去提佢哋打風，同時佢哋都唔係老奉要接受我哋嘅建議。如果以施予者自居而要求對方跟自己嗰套，可能就要留心背後嘅動機。我哋亦選擇做多一步，就係風暴之後再去探佢哋，約定中秋飯聚。

祈願一班流浪人貓狗都安安全全，健健康康。誠心所願。

（標題為編者所擬）