梁重皿：打風心理學

颱風襲港，社交媒體見到人衝去海邊影浪。大家可能會問，點解明明咁危險，咁都仲要搏？

呢種衝動可以用心理學解釋。當政府同新聞不斷重複「切勿」同「警告」，可能令人產生一種對抗心理。心理抗拒理論指出有啲嘢越被禁止，人就越想證明自己唔受控制，認為「我唔需要你話我知咩係安全」。

再加上，當天氣同世界變得愈嚟愈唔受掌控，主動行入暴雨入面，反而成為咗一種微妙嘅「掌控感」補償。有啲人可能覺得就算唔係真係控制到個風，但都叫控制到自己點樣面對個風。

而且影到一張震撼嘅巨浪相，放上Threads到爆紅，就係一種「社交貨幣」。當人人都留喺屋企，咁樣嘅動態可以瞬間成為焦點，呢一種「我得你唔得」嘅優越感，就可能令人跌入冒險嘅陷阱啦。

最後，睇得太多手機直播亦好易產生「觀察者安全錯覺」，隔住個moon睇慣咗危險，去到現場都仲覺得自己好似係個　「安全嘅旁觀者」，唔記得咗啲浪真係可以捲走人。

所以，與其話呢啲人唔理智，不如話呢個係人面對權威、恐懼、同埋社交渴望嘅時候，一種好真實嘅矛盾。不過，希望大家都記住咁樣搏命唔單止危害自己，仲會連累冒險救援嘅人員，將其他人置於不必要嘅危險之中㗎。

（原載於作者threads，題為編者所擬）