鄧文豐：過去日子中，你堅持最耐嘅事係咩？

對大家嚟講，喺過去日子入邊，你認為最有意義同堅持最耐嘅事係咩呢？

過去四年，我同一班弟兄姊妹一直堅持每星期探訪無家者，但就曾經因為疫情而被迫暫停。我記得經歷大約八個月的二人限聚令，當條例逐步放寬後，我再次聚集義工出隊，但當時仍然願意參與的義工係唔夠10人，甚至之後有兩至三次探訪，都只有我和傳道人兩個自己去探街坊。

其中有一次，因為整日Cafe工作都好忙，去到出隊時我同傳道人真實分享講；「我真係好攰好想放棄，點解做極都好似冇人嚟咁，係唔係天父唔想我再做呀。」當然呻完喊完之後就梗係繼續堅持出去探訪啦。

但其實到今日我問我自己為乜嘢繼續堅持去探訪街坊，主要有好幾個原因。

第一，我記得喺探訪入面其中一個畫面，就係每次去天橋上面嘅時候，其中一位熟絡嘅街坊都會離遠向我招手，仲話：「肥仔哥，又嚟喇！你份人真係好心啊，成日都嚟搵我哋。（下刪除一萬字關心說話）」

同埋每一次走嘅時候，街坊們都會講「下次再見」，所以每次當想放棄嘅時候，都會記得我應承咗佢哋「下次再見！」

第二，每次回想和義工們一起服侍的畫面，總係會不斷激勵我，提醒我並唔係自己一個行，而係有一班有心人同我一齊回應神。每當我拉物資拉到攰，總會有人接我手拉落去。

第三，過去五年不斷經歷天父嘅供應，我就知道係佢俾機會我同佢一齊愛呢班人，每當冇錢同現金券買物資嘅時候，冇同其他人講嘅情況之下，總會有啲有心人奉獻一筆剛好嘅資源去買物資，喺每一次同街坊食團年飯、中秋飯、聖誕聚餐，都總係足夠有餘！

最後都想同大家分享多一個故事，呢件事發生喺過去12月21號嘅冬至聚餐，根據過往經驗其實每次聚餐街坊參加人數最多都係20幾人，所以今次經過我精打細算後，只預備咗剛剛好的食物，再加上前一晚都無乜休息，所以成個人都係一個好緊張好攰狀態。

不過，當晚就有有突發事情，原來好多街坊收到邀請帖之後，都因為當晚係冬至，所以有62人嚟咗，個場坐爆晒，當時我最擔心唔係唔夠飯俾大家食，而係唔夠位俾大家坐，因為我工作嘅教會都唔係好大，喺嗰個情況我係勁大壓力。

我有諗過不如唔好講信息，同大家傾吓偈算，但我身邊嘅義工都支持我繼續落去，所以當晚講完佈道信息之後，有好幾位街坊都舉手願意接受耶穌基督為救主，好多時候當面對辛苦壓力嘅時候，我哋好多時候都可以選擇放棄，但如果我選擇堅持呢？

可能成件事都會有唔一樣嘅結果，因為堅持，我有多一次分享信息嘅經驗；因為堅持，別人有機會聽到耶穌；因為堅持，天父使用呢件事感動街坊接受耶穌基督為救主。

所以我邀請大家，讓天父陪你搵到一件有意義又值得堅持嘅事，俾佢帶你一齊行，經歷好多好多嘅恩典。

（原為作者在中學分享講稿，經編者刪節修訂）