牧羊犬：蜘蛛俠面具下的救贖：擁抱真實的自己
(慎入，含劇透）
承繼住《No Way Home》最後，Peter Parker 失去咗一切，連MJ同Ned都唔記得佢。到今集《Brand New Day》，心入面有好多感觸。強烈建議大家要先睇Tom Holland之前三集嘅Spider-Man，會更加明白Peter Parker嘅掙扎。呢一集嘅賣點唔係一場場英雄對抗反派嘅動作大片（其實裏面都有幾精彩），更加係一場關於孤獨、自我認同，同埋靈魂深處點樣尋找救贖嘅對話。
我會話，今集電影真正嘅主角唔係Spider-Man而係面具背後嗰個充滿掙扎嘅Peter Parker係佢嘅Brand New Day。
▍英雄的孤獨與內心掙扎
Spider-Man與Peter Parker的角力，從來都係咁多套蜘蛛俠嘅劇情主線之一。
今集電影一開場，就見到Peter喺一個無人記得佢嘅世界入面，孤獨咁做住「好鄰居」。佢以為只要戴上面具，極力將Peter隱藏喺Spider-Man嘅身份後面，就可以保護身邊嘅人，唔會再重蹈失去Aunt May 嘅覆轍。佢甚至講出咗一句好痛嘅說話：「Sometimes Spider-Man has to do the hard thing, even if it breaks Peter Parker’s heart.」
呢種將「責任」同「個人幸福」完全對立嘅心態，其實好真實咁呈現咗我哋好多時面對嘅掙扎。喺信仰群體入面，有一種迷思：我哋有時都會不自覺咁戴上一個「屬靈」嘅面具，以為要服侍上帝、要做好基督徒，就必須埋藏自己真實嘅感受同軟弱。Peter 將自己嘅變異進化（mutation）視為一種咒詛，拼命想控制同壓抑，正正反映咗佢對真實自我嘅拒絕。
但係，正如戲入面Bruce Banner問佢：「What parts of nature are good or bad?」我哋點樣去定義自己生命中嘅不完美？好與壞又是如何，由誰來界定呢？
▍擁抱真實：最大的責任是愛
每一集我都期望電影會點樣更深層次咁去演繹Spider-Man的經典座右銘：「With great power comes great responsibility」。今集可謂呢我最感動。
喺Jean Grey成功進入Peter內心世界嗰一幕中，佢睇到Aunt May曾經同Peter講過嘅說話。Aunt May提醒佢，人哋愛佢係因為佢嘅本相，而唔係因為佢有咩超能力，並講出咗一句比「With great power comes great responsibility」更深刻嘅教誨：「That’s your deepest responsibility.」
原來，最大嘅責任，唔係拯救世界，而係勇敢咁接受同愛真實嘅自己。除咗蜘蛛俠，原來每一個人都係。
當Peter喺最後一戰，被Jean Grey問到：「Are you Peter Parker, or are you Spider-Man?」佢終於明白，佢唔需要二選一。佢除下抑制器，擁抱自己嘅變異，接受咗自己既係 Peter Parker，亦係 Spider-Man。呢種「接納」，就係最大嘅釋放。（我覺得佢呢個接納，係繼承咗佢恩師Tony Stark 擁抱咗自己係Iron Man，亦係Tony 對 Peter 嘅最大期望同教導。）Peter 就係冇咗套Spider-Man suit, 佢依然係有能力戰勝邪惡的嘅Super Hero。
▍救贖的連漪：從自己到他人
當Peter願意釋放真正嘅自己，奇妙嘅事就發生咗。佢呢份真誠同接納，唔單止救贖咗自己，仲感化咗進入佢內心世界嘅Jean Grey，令佢從失控中平靜落嚟。甚至連一向以暴易暴、被仇恨綑綁嘅The Punisher (Frank Castle)，都因為睇到Peter嘅轉變而得到某種程度嘅釋放。
呢個過程，就係Aunt May墓碑上嘅 motto：「When you help someone, you help everyone.」
從Peter Parker睇今集，會見到故事非常完整而且精彩感人。
▍我嘅信仰反思
電影令我諗到基督教信仰最核心嘅價值，其實唔係叫我哋做一個完美無瑕嘅「超級英雄」，而係喺上主嘅愛入面，勇敢面對自己嘅破碎。
耶穌基督道成肉身，正正係進入我哋充滿掙扎同軟弱嘅世界。福音書中，無論使唔使用「超能力」去醫病趕鬼定令死人復活，耶穌都係接觸每個人最真實嘅內心需要 。
耶穌冇要求我哋戴上面具先可以親近佢。相反，當我哋願意好似Peter咁，向上主敞開自己最脆弱、最真實嘅一面，上主嘅恩典先可以真正介入。
喺呢個充滿比較，指指點點同標籤嘅時代，我哋係咪仲有勇氣「除下面具」？係咪願意承認自己嘅不完美？
當我哋經歷過被上主無條件接納同赦免嘅愛，我哋先有能力去愛身邊嘅人。就好似 Peter 救贖咗 Jean Grey同Frank Castle咁，一個被愛觸摸過嘅生命，自然會成為別人嘅祝福。呢種生命影響生命嘅力量，遠比任何超能力更強大。
仲有一點令我深思：上帝創造人，本就是群居的。創世記說，上帝見到人獨居不好，所以為人預備同伴。Peter喺整套戲入面，最大嘅傷痛唔係控制唔到超能力，而係孤獨——佢冇辦法同佢最珍惜最愛嘅人好好相處。上帝給我哋每個人，都有屬於自己獨特嘅使命或擔子，有些重量，可能真係要自己去承擔、去完成；但祂從來冇叫人孤獨地去面對。Peter最後嘅釋放，令佢可以重新同MJ 及Ned 連結，就連有類近經歷嘅Yelena 見到都為佢感到欣慰。Peter嘅釋放令我見到真誠嘅感染力： Jean Grey嘅信任同解執，Frank Castle嘅笑容，眼淚與同行。呢啲畫面，正正係上主恩典嘅其中一種形態。
願我哋喺變幻嘅時代入面，無論面對幾大嘅孤獨同掙扎，都能夠有擁抱真實自我嘅勇氣，並喺上主嘅愛中，搵到真正嘅救贖與平安。
