梁重皿：《奧德賽》中最危險的東西

（劇透提醒：以下內容涉及《奧德賽》情節）

如果有一朵花，可以令你唔再痛，你會唔會食？

《奧德賽》入面，最危險嘅，未必係怪物。而係，可能只係一朵令你唔再痛嘅花。

食咗 Lotus 嘅人，慢慢唔再想返屋企，甚至開始忘記自己原本想去邊。因為真正令人迷失嘅，有時唔係痛苦本身，而係一種太舒服嘅逃避。

其實現實生活入面，我哋都有自己嘅 Lotus。有人不停做嘢，忙到冇時間諗；有人一有情緒就狂碌電話；有人將每日行程排到密麻麻，唔畀自己停低；亦有人習慣將「唔諗就冇事」當成處理情緒嘅方法。

心理學有一個相關概念叫 emotional / experiential avoidance（經驗性逃避），即係當一個人反覆嘗試逃避、壓抑，或者控制自己唔想感受到嘅情緒同內在經驗（Chawla & Ostafin, 2007; Hayes et al., 1996）。

短期嚟講，的確會舒服啲。你唔使面對，唔使諗，唔使痛。但問題係，如果每一次痛，我哋都選擇逃開，我哋可能慢慢連自己真正想要嘅人生，都一齊避開（Kashdan et al., 2006）。

逃避唔一定代表你懦弱。好多時，只係因為你曾經搵到一個方法，令自己暫時冇咁辛苦。只不過，當「暫時舒服」變成唯一嘅生存方式，我哋嘅世界亦可能愈來愈窄。

真正嘅療癒，未必係令自己以後都唔再痛。而係有一日，你仍然記得發生過嘅事，仍然知道嗰段經歷曾經令你好痛，但你已經唔需要忘記佢，先可以繼續行落去。

所以，如果面前真係有一朵Lotus，你想擺低嘅，究竟係嗰份痛苦，定係你原本想去嘅人生？

（原載於作者IG，題為編者所擬）