又到國際冷笑話日 爛gag降温

大家好，唔經唔覺，又係一年一度嘅國際冷笑話日！全球升温、戰火漫天，熱到中暑，點算？不如講幾個冷笑話畀自己聽，降吓温！世界爛透，點部署？講啲比世界更爛嘅gag，你最爛，世界就吹你唔脹！各位小編為大家沖咗幾杯冷笑話，希望你哋飲完，今晚瞓覺唔使開冷氣！

▍ 動物篇

有一日你去沙灘游水，忽然覺得其中一隻動物對伴侶好專一，到底你遇到咩呢？海龜？水母？

答案係最簡單嘅魚！因為始終「魚」一。

咁最鍾意魚嘅係咩？竟然唔係其他海洋生物，而係雞？梗係啦，因為「雞泡（抱！）魚」。

又有一日，你行山經過荔枝窩，發現呢度嘅牛比起西貢、大嶼山嘅同類更外向，你無見過牛會對住路人咁大聲咁叫你「行開啦」！但你諗多陣，發現有種動物比佢哋更加外向，咁係咩呢？答案同樣好簡單，係小鳥，因為小鳥「依人」（E人）。

▍ 家庭篇

話說Ms Wong同馬生新婚無耐，就生咗個B，阿囡啱啱出世仲喺度喊，Ms Wong問老公佢叫咩名好，馬生話，我唔知呀，不過佢姓咩我就知，姓「李」。Ms Wong碌大對眼望住佢問：「你姓馬、我姓王，無啦啦幫阿囡改姓做乜？」馬生微笑說：「等我話你知啦，因為『皇家馬德里』（王＋馬＝李）」。Ms Wong嘅反應，應該就同而家在座各位一樣喇。

Ms Wong同馬生嘅鄰居李家，好鍾意喺屋企煮飯。點知有一日阿囝食食吓飯，忽然苦埋胞腮，李太問佢：「咩事啊？」佢不斷搖頭，只係指住條清蒸石斑。李生會心微笑：「我知佢想講咩，一定係今日學校發生咗啲事，令你好『瘀』（魚），係咪？」李太、阿囝同時望住佢。

呢啲 dead/dad jokes，做得人耐，點都有聽過。生活苦悶，喺屋企放吓屁，其實有咩所謂？爛，就盡情玩爛啦！消暑呀～

文：Jon

（鳴謝部份爛gag協力提供：Yani、Sunny叔叔、V）