23歲女生因串謀詐騙入獄四年 獄中讀書出獄成傳道人

諗吓，如果你20歲就賺到100萬，不過覺得有啲唔妥，筆錢如果唔係呃人係無可能賺到，咁你會唔會繼續呃落去？現職傳道人的曾慧妮(Kathy)廿幾年前在模特兒公司工作，遇到這個情況，本來決定辭職，卻因為無法抗拒老細的挽留，結果以「串謀詐騙」罪名入獄，判監4年。

Kathy說，如果不是入獄，她就不能離開老細、不能停止欺騙。但她並不怪責老細「拖垮佢」，認為被說服繼續行騙是「自己軟弱」，必須自己負責任。「神拘捕我，我先停到手」。

▍  因行騙而抑鬱的「兩父女」

Kathy在模特兒公司工作時，做「星探」遊說男人到公司付錢上美容課程、影相等，聲稱之後會安排工作，最後卻無法兌現承諾。她解說，說服客人買服務只是市場行為，但因為客人上來是為了接job而不是付錢，所以當他們報案，法官就將這個行為定為「串謀詐騙」。她形容，當時業界都會利用這個「法律罅」做「嗱渣嘢」騙財。憑她「三寸不爛嘅舌頭」，「每張卡都會比我『碌爆』，所以我好快成為top sales。」20歲已經賺取一百萬。

「我16歲入行嘅時候，真係唔知道係呃人。但當我搵到第一桶金嘅時候，就知咩事。」一邊每晚祈禱懺悔、一邊每日照呃人，令Kathy覺得「好虛偽」，要「連自己都呃埋」，於是決定遞辭職信，卻因為老細挽留而沒有離開，直至被捕下獄，當年23歲。Kathy形容，老細跟自己「爹」、「女」相稱，雖然一定有利用自己，但「對我嘅關心係真心嘅」，曾帶她去旅行，見識世界。所以當他出言挽留，說做完就收手，一齊去外國讀書，她便答應，並期待未來繼續有他照顧。

法官判決時指，四名被告各有角色，「與模特兒接洽、交收金錢及安排工作的曾慧妮，是最想收到金錢的人」。感化官報告又指，「被告毫無悔意及反省」。Kathy認為，老細知道自己做錯，但認為錢比良心重要，就選擇行騙。但他這樣選擇，不代表她自己也要這樣選擇，所以辭職；她選擇留低，只是因為沒有勇氣割捨跟老細的羈絆。

等候判刑期間，Kathy抑鬱到想死，就決定找牧師傾訴，「因為唔會爆出去」。出獄後，其實Kathy帶了老細他信耶穌。不過，他最終無法接受「出咗獄乜都無晒」，同樣抑鬱、沉迷慾海，最後跳窗自殺。出事當晚，老細其實曾打電話來，Kathy想過：「如果我聽咗電話，咁佢會唔會就唔跳？」但又轉念，覺得自殺始終是他的決定。老細過身當晚，Kathy祈禱希望上帝「用雙手托住佢」。

▍  獄中才明白母親「留隻雞脾」的愛

Kathy形容自己「反叛」，因為在五姐妹中她排第三，既不能像家姐背負父母的期望，又不能像妹妹嬌嗲討父母歡心，甚至因為在家中負責「倒夜香」被家人喚做「倒屎婆」，自覺「可有可無」。於是她走「反叛」路線，努力賺錢「畀家用阿媽」，證明自己的價值。

母親不擅表達愛意，所以Kathy從不覺得母親愛自己。直至後來坐監，某天中秋「加餸」有得食多隻雞脾，母親探監時說：「你鍾意食雞脾嘅話，我日日煮畀你食。你係我心肝寶貝，個個女我都錫，但你最耳仔軟，容易聽人講，所以我最擔心你。見你依家咁辛苦，情願替你坐監。」Kathy從未聽過母親說自己是她的「心肝寶貝」，自此不再覺得自己「可有可無」。

出獄至今十四年，母親仍然每星期煮隻雞給她食，定時叫她「返嚟攞雞喇」。Kathy細個從未察覺，母親每次煮雞，都會為自己留隻雞脾，就是知道她「最唔出聲、乜都無所謂」。

▍  見證「騙徒」悔改而戒賭的苦主弟兄

等候判刑的兩年，Kathy決定返教會，但原來當時的團契，團友阿錦是其中一個受騙的苦主。Kathy說自己「狀態行屍走肉」，竟然不認得他。當阿錦向牧師提起這件事，牧師勸他不要說穿，要保護真心悔改的Kathy，阿錦感到委屈，「明明我先係受害者，點解咁唔公平」。

然而，阿錦就真的在旁觀察Kathy是否真心悔改，甚至當她入獄，也有份寫信給她。有賭開馬的阿錦在Kathy新書《完全變態》中憶述，有次寫信問Kathy「讀聖經讀成點」，決定如果連這個「騙徒」都對信仰如此認真，那他這個「賭徒」都要戒賭。而Kathy當時已讀完《新約聖經》，阿錦最後不但戒了賭，更洗了禮。

Kathy出獄、成為傳道人後，阿錦才約她出來食飯「相認」，說自己是其中一個苦主。Kathy錯愕之餘，問他「點解唔早啲講？」阿錦說是牧師覺得時機未到，然後Kathy向他表達感謝，認為如果他一早講明，她就會因為罪疚感、「冤家路窄」而離開這間教會。如今透過阿錦，Kathy感受到，上帝真的原諒了她的過錯。

文：Jon