「嗚就明——鳥鳴模仿大賽」 以輕鬆方法引起公眾對雀鳥的關注

繼發呆比賽後，香港又有千奇百趣嘅比賽！不論係你定係身邊嘅朋友，總有一個會扮過「升key雀」「餓屙～餓屙～」咁叫。喺壓力大、壓抑嘅香港，能夠有一個空間，將日常生活嘅小趣事變成大比賽，搞笑地認真、認真地搞笑，正正係香港需要嘅正能量。籌委會成員兼大賽主持Nicholas表示：「最主要都係想用輕鬆又無聊嘅方法，去引起公眾對雀鳥嘅關注。」

當被問到知唔知點解今次比賽咁大迴響，籌委會回覆：「可能因為有共鳴，鳴就明啦」。「鳴就明——鳥鳴模仿大賽」上週六（23日）下午喺香港大學舉行，最初籌委會曾經擔心會唔會冇人參加，要一人飾演晒籌委、工作人員、參賽者多個角色，誰不知早前嘅初賽竟然吸引97個「升key雀」界嘅強者參賽！喺籌委們辛苦嘅篩選下，揀出20位進入決賽。當日更有超過150人觀賽，場面墟冚。

▍原來「升key」係為出pool

原來，升key雀「升key」都係為咗出pool啫…香港觀鳥會近日喺社交媒體回覆網民留言：「同好多人一樣，噪鵑（升key雀）嘅一個重大任務係出pool」，而「升key」就係吸引異性嘅手段。

觀鳥會亦提到，城市噪音例如車聲，有時會遮蓋噪鵑嘅叫聲，正所謂「阻人拍拖係大忌」，噪鵑可能會為咗避開噪音時段而提早開始叫。

▍參賽者：「冇諗過會有一個咁public、咁隆重嘅比賽」

籌委指，海外都有啲扮海鷗叫嘅比賽，「（參賽者）直頭誇張到油晒成塊面做白色，務求扮到好似一隻雀咁」。籌委又分享：「舉辦呢個活動只係出於一班熱愛生態嘅人嘅衝勁，希望透過比較幽默同歡樂嘅手法，令更加多人同我哋一樣開始去認識同欣賞我哋嘅大自然。」

冠軍得獎者Bob分享，當初扮「升key雀」，只係因為「鍾意用啲聲去呃下朋友」，亦鍾意研究個嘴可以有咩變化同有咩聲。Bob搞笑地分享，其實當初參與比賽只係因為「咁就唔使俾入場費」，誰不知竟然贏咗比賽，佢坦言：「冇諗過會有一個咁public、咁隆重嘅比賽，所以都好有興趣玩同睇下個現場。」

文：Chaka