今日係世界八爪魚日！八爪魚即係章魚，唔係墨魚都唔係魷魚！

今日（10月8日）係「世界八爪魚日」（World Octopus Day）！講到八爪魚，應該無人會話唔知係咩嚟，但真係要認真分嘅話，係咪聽到八爪魚、墨魚、魷魚、章魚、花枝呢堆名都頭痛呢？所謂章魚，其實就係八爪魚。顧名思義，最重要嘅特徵，就係有八隻粗大同有吸盤嘅爪。至於個頭，係比較細同呈圓形嘅。

至於墨魚同魷魚，其實佢哋都有10條觸鬚！至於分辨佢哋兩者，其實都唔難。古語有云：「魷魚係尖嘅，墨魚係圓嘅！」魷魚身形比較瘦長，頂部呈三角形，入面有透明軟骨，墨汁相對比較少。至於墨魚嘅頂部呈橢圓形，仲有透明硬殼，10條觸鬚入面有2條特別長，仲有豐富嘅墨汁。記住！花枝都係墨魚呀！

講返「世界八爪魚日」，根據世界動物保護協會資料，目的係引起大眾對呢種聰明又有感知能力嘅海洋生物嘅關注 。八爪魚有3個心臟，兩個負責將血液泵去鰓部，另一個泵去全身。以動物嚟講佢哋算好聰明，除咗有1個「中央大腦」，仲同8個喺觸手入面嘅「迷你大腦」，可以獨立感受、聞、嚐同處理資訊。雖然佢哋平均壽命得1至2年，但曾經有隻八爪魚媽媽為咗照顧下一代，足足堅持咗53個月！

不過，八爪魚正面對唔少生存威脅。氣候變化同海洋污染令佢哋容易誤吞塑膠廢物，影響健康。世界各地嘅過度捕撈同破壞性嘅捕魚方法，亦都威脅緊佢哋嘅生態。仲有，雖然包括智利等等嘅國家，開始禁止商業八爪魚養殖，但呢個產業喺某啲國家仲擴張緊，好似西班牙加利西亞舊年就批准咗一個實驗性嘅八爪魚養殖場 。

趁住世界八爪魚日，大家除咗學識分八爪魚、墨魚同魷魚之外，都不妨多啲關注海洋保育啦！

話時話，你仲記唔記得章魚同花枝係咩？

文：LikHang