宏福苑災後爆盜竊案 居民吳小姐：有機會係遺物嚟，點解都要偷？

早前有3名參與大埔宏福苑加固工程的工人，涉嫌在宏泰閣單位內盜取首飾被捕。加固工程於今日（9日）恢復，警方加強保安措施，包括加強警員人手、紀錄屋內財物、工人完成工作離開屋苑前要搜身。同日有宏福苑居民在商台節目表示，對事件感憤怒，質疑警方保安有明顯漏洞，認為現時做法無疑是「亡羊補牢」，但為時已晚。她又指，許多居民情緒崩潰：「好多老人家其實好乖等緊（上樓取回財物），但係我哋好似一直等，究竟我哋要等幾耐呢？之前政府係冇講過可以返去，係我哋發公開信聯署先回答四月底，好似要迫我哋搵傳媒發公開信先肯回應。」

▍質疑警方有明顯保安漏洞

街坊吳小姐直言，對事件感到非常憤怒，形容三個月以來街坊身心俱疲，經歷一次又一次的傷害。她續指，居民一直擔心發生類似事件，最終卻惡夢成真：「其實我哋唔係冇出過聲㗎，有街坊喺12月打過1823，send過email同大埔警區反映擔心有偷竊案發生，叫警方唔該鎖好1984戶單位，但佢哋回覆大閘已經上鎖咁就算。」

吳小姐指出，街坊印象中拆棚是在今年年初進行，估計正進行加固工程，形容當時「每一個單位都中門大開」。她又續指，爆竊案是由街坊通報，上週四（5日）看到單位有著燈，慨嘆當時人心惶惶，翌日發現真的發生偷竊案：「依家警方先話亡羊補牢？一切已經為時已晚，點樣判斷到其他單位冇人再畀人偷嘢呢？呢幾個月只係捉到一單？我哋真係唔敢再相信警方囉。」

吳小姐更連番質問，「點解唔一早做好把關？依家先諗到金屬探測器，諗到要搜身？仲要依家先話安排儲物櫃，咁係咪之前啲工人可能自己攞咗個袋上單位，攞咗啲金銀珠寶夾帶私逃呀？之前啲工人落樓有冇check袋呀？點解咁簡單嘅保安都做唔好？」

▍期望早日上樓執拾財物

對於被問及警方現行加強保安措施的做法有否令人「安心」，吳小姐就直言原本明顯有保安漏洞，即使加推4大措施也未能釋除疑慮：「擔心再發生一次......（當局）從來無問我哋想點……（希望）唔好夜長夢多，快啲畀我地上樓（執拾），可唔可以加快啲？」發生懷疑盜竊事件的宏泰閣，被確認為宏福苑大火死傷最嚴重的樓宇，吳小姐悲痛問：「有機會係（遇難者）遺物嚟，點解都要偷呢？」

警務處處長周一鳴昨日（8日）稱，加固工程將於今日恢復，警方會加強保安措施，包括加強警員人手、紀錄屋內財物、工人完成工作離開宏福苑前要被搜身。進行加固工程的工人會先被登記身分證號碼及電話等資料，再由警員陪同上樓工作，工作時不會攜帶背包等。警方之後會為工人安排儲物櫃放置財物，每人不可帶超過500元上樓。

文：Karina