阿享：還是做小眾最好？

話說大前晚（14日）香港足球代表隊，踢佢哋喺啟德主場館嘅第二場比賽，入場人數再次刷新紀錄去到45,489人。然而熱鬧背後，開始有唔少人出現反彈，例如有人批評唔打氣、唔拍手，唔企嘅人做咩要買球迷區波飛、又批評喺港隊只係贏緊一球，同埋又唔係表演賽點解要玩人浪，仲有就係批評愈嚟愈多人入場係為咗打卡湊熱鬧，根本場波港隊咩賽果都唔關佢哋事。有人甚至開始懷念以前港隊喺大球場或者旺角場比賽，因為入得場嘅都係「真球迷」。

歷史總係驚人地相似。說話當日君士坦丁大帝畀咗基督教合法宗教地位，到後來羅馬帝國直情將基督教升格為國教，都出現唔少問題。例如因為成為國教後，信耶穌變成一件有利可圖嘅事，所以大量未真心相信同悔改嘅人湧入教會，信徒質素開始下降。量多咗，但質低咗。跟住呢班人又將以前拜異教嘅習俗帶入教會，挪用到教會嘅禮儀入面。仲有就係以前教會被逼迫時，信徒都要匿埋喺屋企，或者喺好細嘅地方聚會，但變成國教，多咗有錢人信之後，教堂就愈起愈宏偉堂皇，教會亦都愈嚟愈多形式嘢要搞。

當時嘅信徒，同今日嘅球迷一樣，本身都係希望志同道合嘅人愈多愈好。然而，當人真係多咗，變成主流之後，又發覺件事同以前唔同咗，變咗質，甚至驚劣幣驅逐良幣。問題係，當你見到波飛愈嚟愈難搶，波衫都要排隊買。甚至羅局長已經表明爭取恆常化啟德作為港隊主場（就如政權介入宗教事務？)，你就知呢個狀況已經係不可逆，只會繼續增長落去，睇下歷史上基督教之後嘅發展你就知。

昔日，有唔少忠實嘅信徒有「覺得以前好啲」嘅諗法，見到大公教會愈嚟愈唔似樣，就決定退隱入深山做隱修。但球迷呢？恐怕只有「繼續撐，繼續入場」呢條路可以走吧。

（原載於作者IG @fmc_wch）