阿享：點解收檔就要關係和好？

試當真執笠Live之時，我正做緊研經法功課，經文係馬太福音5:21-26，論仇恨。心散緣故，手痕撳咗入試當真嗰live睇下，就撞正公司元老Ellen，忍唔住要喺收台前針對老闆游學修嘅言論開波。

我唔太熟試當真情況，但剩係睇呢一幕都見到啲端倪。嗰live一早講好12點就完，試當真隨即就收檔，但因為游學修cue咗Ellen出嚟，Ellen有嘢發表所以加時。然後呢個狀態下冇人敢出聲打完場，其一就係老闆同元老開片，即係天神打交，人類小薯只能睇戲。其二就係呢個矛盾已經好耐，大家都心知肚明，只係睇幾時擦槍走火，幾時爆炸同點樣爆炸。

當時嘅YouTube live，同埋事後喺threads唔少人都覺得呢一幕畫面好難睇。第一係有咩唔可以喺off mic之後講，要揭晒出嚟畀6萬幾人同步睇。第二係你員工有不滿就片嗰老闆，你係啲咩員工咁巴閉，可以直斥老闆咁無禮貌，邊個仲會請你云云。呢啲都係有其道理嘅質疑。但有種說法係都收檔喇，點解唔可以好嚟好去。咁就不禁要思考，點解收檔就要關係和好？

人嘅生命即將結束，都姑且有身邊人仍然係有情緒，仍然有未解嘅心結，仍然冇辦法重新接近，和好，咁更何況依家只係一個團體/公司嘅結束，大家仍然活生生咁喺到。點解會覺得收檔就係一個將所有關係reboot，所有問題迎刃而解嘅原因？

試當真收檔，可能係一個因，係個契機令裡面嘅人重新處理啲破碎嘅關係，重新處理自己喺到累積到嘅負面情緒，唔需要再開口埋口為咗件事好而勉強自己。但佢哋收檔絕對係一個果，就係因為太多複雜嘅人事問題。大家其實有愛，但好多嘢儲埋，積重難返，所以大家都辛苦之下，先有收檔呢個決定。如果唔係游學修都唔會多番係鏡頭前表示，試當真收檔之於佢而言，係解脫，就係唔需要再勉強落去。

如果旁觀者搞唔清楚狀況，覺得收檔日應該要嘻嘻哈哈，製造一個畫面好靚，好感動嘅景象，無視context，無視人同人之間嘅愛恨情仇。咁試當真執笠，其實於你而言都只係一套「試映劇場」，就係一班人飾演就執笠公司員工，大家帶住不捨心情面對執笠，冰釋前嫌。喂，咁你係睇緊大台定試當真呀？

「所以，你在祭壇上獻禮物的時候，若想起弟兄向你懷怨，就把禮物留在壇前，先去同弟兄和好，然後來獻禮物。」咁樣嗒段經文，又真嗒出唔同嘅味道。

（原載於作者IG）