阿享：學習在chronos中期待kairos——從手球隊爆紅說起

讀神學嘅第一年，即使未修希臘文，老師都教咗兩個詞。第一個叫chronos，第二個叫kairos，兩個詞都係古希臘人用嚟形容時間。chronos代表線性、可測量嘅時間，即係尋常中嘅一分一秒；至於kairos就係指質性、特定嘅時間，例如重要同充滿機會嘅時刻，一般都要人把握住或者捉緊。神學上，chronos可以理解為屬世嘅時間，好多時候都只係平淡乏味嘅時間流逝，而kairos則係上帝命定嘅時間，係神聖時刻。

今屆全運會，毫無疑問就係香港手球隊嘅kairos。

相信好多人都聽過或睇過相關報道，知道手球隊16位成員中，有多達15位辭咗正職或者停薪留職，就係為咗備戰今次全運。結果，手球隊非常爭氣，越戰越勇，越行越遠。嚟到銅牌戰，港隊雖然輸畀北京無緣獎牌，但已經創造咗歷屆最佳成績。

除咗成績，今次手球隊嘅全運神奇之旅收穫咗好多佢哋諗唔到，或者香港人都諗唔到嘅嘢。例如，我哋冇諗過為咗睇手球，香港地會坐爆一個5千人嘅場、香港人會搶飛，入到場會瘋狂咁由開波到完場不停嗌，不停打氣。手球嘅獨特之處，在於球員同觀眾嘅互動好直接，大家嘅情緒相互牽引，球員打得好觀眾叫更大聲，觀眾叫得更大聲球員就越落力，越興奮。所以，5千人一齊嗌「We are Hong Kong」，產生到嘅力量係我哋想像唔到咁大。

手球隊隊長謝永輝喺四強輸畀安徽後受訪，表示從冇諗過可以見到球場坐滿人睇手球隊打波嘅畫面，而呢個畫面就話畀成支手球隊聽，佢哋過去付出嘅努力並冇白費。手球隊上下，一直過住返正職同時兼顧打波嘅生活。喺香港做運動員，仲要唔係精英項目嘅業餘運動員，冇咩成績交得出手嘅，就預咗過冇乜前途、冇乜資源，同埋冇乜人理嘅選手生涯，但佢哋仍然堅持。經歷無望嘅chronos後，手球隊把握到屬於佢哋嘅kairos，一個呢世人都唔會忘記，深深咁印咗喺佢哋，同埋好多支持者心坎嘅kairos。

然而，打完銅牌戰後，教練許文邦受訪就指球隊喺全運之後，11月嘅6次練習得2次用到室內場，所以喺講咩爭取多啲資源之前，最迫切希望場地上有更多支援。全運會手球項目曲終人散，所有人同事又歸回尋常，大家都要回到chronos，繼續努力。而見證呢一切嘅我哋，今次手球隊嘅kairos，會唔會都令你重新審視嗰啲看似乏味，甚至無意義嘅chronos。學習在chronos等待屬於自己嘅kairos，當kairos嚟到時要知道如何辨識同埋知道點樣把握住，就好似手球隊一樣，打返場爭氣波。

（原載於作者IG）

圖：2025全運會香港賽區Facebook