劉姑娘：傳道人在老師午餐會的分享

大家好！我叫阿Cool，劉姑娘，係2月入職嘅傳道人。之前收到風呢，呢個午餐交流會，係等我講完嘢、祈埋禱先開飯嘅，對我都好大壓力，但我見大家已經食緊野，有啲甚至已經食完飯，咁我都放心啲。

唔知大家有無唔鍾意食嘅嘢呢？我就好鍾意食嘢嘅，都無咩唔食嘅嘢。不過，大家知唔知邊個係Chiikawa？盧sir就一定識嘞，佢頭先一行入嚟，我就見到佢掛住咗小八嘅名牌。

Chiikawa好驚食西蘭花，佢見到西蘭花會有兩行眼淚，不過有次佢見到烏薩奇兔哥响西蘭花上面唧沙律醬食得津津有味，佢又照辦煮碗，吖，又出奇地好食喎。

唔知各位老師、職員响工作上，有無遇到一啲你哋覺得好難溝通、好難相處嘅學生或者同事？可能佢哋曾經帶俾你唔好嘅經驗或者感受，令你見到佢哋都想避之則吉，但你又會發現佢哋同有啲人相處得好好。我哋會唔會都俾個機會自己，好似Chikawa咁嘗試觀察下人哋用嘅溝通方式同自己有咩唔同，開放自己學習下其他人嘅方法？

有時一啲我哋討厭嘅人、事、物，可能就係對我哋生命成長最為有益嘅嘢嚟，就好似西蘭花咁。嗚啦～

願主祝福大家！

（原載於作者社交媒體）