謝甘霖：肥

自從2016年（讀神學第三年）開始，大家見到我都好關心我體型，其實我唔介意大家話我肥，因為我都知道，也經常自嘲。尋日嘅新聞讓我突然有衝動想講一講「肥」呢件事，以下內容不限於自己經驗，不過有小部分係從自己經驗出發。

1. 其實無人想肥嘅，肥係一種生理現象，它指向一種生活嘅狀態，而呢種生活狀態唔單止係食多咗（我其實係食少咗），有好多原因都會引致肥胖：壓力大、唔夠瞓、藥物影響、工作性質、間歇性暴食。但好多時，一種隱形嘅意識形態（多數是非惡意）潛藏喺我地嘅文化中——肥胖係一種特質（trait），一種慵懶、貪婪成性、無節制、軟弱嘅象徵。一個簡單嘅問候「嘩！你近排搞咩搞成咁呀！」都會令當事人產生一種「我呢排好唔得」，想厭棄自己身體嘅感覺；但可能呢排佢好努力工作、努力生活、努力湊仔（哈哈）。呢種對肥胖嘅象徵化，係霸凌手段嘅常用方式，大家都知，肥仔係有個姓嘅。

2. 猶大嘅污名化歷史中最出名嘅應該係第二世紀希拉坡里主教帕皮亞（Papias of Hierapolis）融合了馬太和路加描述猶大的死，帕皮亞的獨特之處在於他想像猶大這個惡人，邪惡至極嘅人，應該是怎樣死呢？沒錯，是肥胖至死的：「猶大是這個世界上行走的邪惡典範，他的身軀腫脹得異常，以至於連馬車可以通過的地方，他都無法穿過，甚至連他腫脹的頭部都過不去。據說，他的眼皮腫得如此厲害，完全看不到光，而他的眼睛甚至連醫生使用光學儀器也無法看到，因為它們已經深深地陷入皮膚表面之下。他的生殖器看起來比任何人的都更加令人厭惡且異常巨大，而當他排泄時，從他身體的各處流出膿液和蟲子，令他極為羞恥。據說，在經歷了極大的痛苦和懲罰之後，他最終死在自己的地方。而由於他的屍體散發的惡臭，那個地方自此荒廢至今，無人居住。事實上，即使是現在，也沒有人能夠經過那個地方而不捂住鼻子，因為他的屍體分解時所排出的物質氣味極其難聞，而且污染的範圍非常廣。」(Fragments of Papias Book 4) 

3. 所以當我哋見到一個人突然肥左，唔好只係read到佢食多咗、無節制，更要看到佢壓力大咗、工作忙咗、好努力生活工作嘅面向，從關心嘅角度多啲欣賞佢哋、幫助佢哋從一個結構性嘅壓力下，用有限嘅時間減重，同埋關注生理以及心理健康（更重要）。