Pastor S：基督徒做社關，可能更容易迷失

唔信耶穌嘅人都會做義工，信耶穌嘅人，反而有時刻意傳福音、叫人返教會；唔信嘅社關人可能行動好激進但對個社區有 impact，信嘅人可能剩係識祈禱。極端啲講，咁如果接觸到嘅街坊信咗耶穌，係咪就唔使關心呢？又，一至五返工都夠忙，禮拜六日俾埋教會仲唔夠？額外花時間落區做乜？

啱啱1號夜晚打聽到2號會清場。尋晚再去隧道，真係九成空。探開嘅露宿者有啲無電話，或者成日換電話號碼（儲值咭），所以無辦法直接搵得返晒佢哋。而當呢個曾經係佢哋嘅家都被粉飾太平，我哋仲可以去邊度搵佢哋呢？調返轉問吓自己：既然可見嘅需要已經消失咗，係咪要刻意製造仍然有需要嘅假象，自我滿足呢？使命隨著環境轉變而完結，欣然接受或許都係一件好事？

愈諗愈迷惘，都係走返入公園睇吓咩環境。殊不知同其他街坊展開咗「激情對話」，又有另一番發現同體會：上咗樓嘅露宿者習慣咗返嚟球場睇波、叔叔阿姨食完飯無嘢做就落街做運動、把口話「瞓公園唔啱」但同露宿者一齊飲咖啡嘅保安阿姐⋯⋯呢啲街坊都唔係經濟上最有需要嘅人，但唔代表佢哋無需要，甚至佢哋都有共通嘅渴望：被看見、被聆聽。我哋當然肉眼會睇得見佢哋，但係我哋好多時候都選擇無視；我哋亦聽得明佢哋講咩，但好多時我哋都選擇性失聰——我哋希望優先服侍最窮嘅、最缺乏嘅人——但當我哋太有目的性咁去做社關，又會唔會失去緊社關嘅本質呢？

最盞鬼就係啲街坊會關心，甚至鼓勵返我哋。「打工仔一定辛苦，唔好捱壞自己啊。」「 食飽未啊？你咁瘦」「 呢度係我哋主場，你哋都要努力為香港爭光啊！」 其實諗返轉頭，都唔知點解佢哋講講吓講呢啲。不過呢種自然嘅對談交流，反而好感受到我哋真係同呢個社區連結緊，而唔係針對某啲對象去施捨。甚至乎，過程中係有被款待嘅感覺。呢度的確係佢哋嘅社區，佢哋接待咗我哋呢幾位有心嘅過客。當中嘅共融、平等、愛嘅流動豈唔係教會本該展現出嚟嘅咩？喺傾偈嘅嗰一刻，公園彷彿比教會更教會，接納咗我哋呢幾位異客進入佢哋嘅社群，街坊向我哋分享自己嘅「好消息」。當佢哋被看見、被聆聽，佢哋都會看見、聆聽我哋。個晚其實我哋無嘢幫到佢哋，物資都無帶出去，但呢種平等分享、同行關係就肯定緊雙方「被需要嘅需要」。

基督徒做社關，可能更容易迷失。失落嘅時候落區走走，吹吹水，可能就有新視角，可以重新檢視當下嘅自我。

（相片由作者提供，原載於作者IG）