梁重皿：可以失望，但唔需要失去希望

今日係DSE放榜日。

對好多考生嚟講，今日可能係期待已久的一日；但對另一啲人嚟講，可能係充滿失望、迷惘，甚至自責的一日。

點解放榜會令人咁痛？令我哋心痛的，往往不只是結果，而是我們曾經期待的未來，那個原本以為會發生嘅人生。心理學稱之為「loss of expected future」。

不過，希望大家記住，情緒本身唔需要被否定。

如果你因為結果未如預期而難過，想喊、唔想見人、唔知點同屋企人交代，覺得自己好失敗，並唔代表你脆弱，而係因為你一直都好重視呢件事。當一個人投入咗大量時間、努力同期望，一旦結果落差出現，失望係一個正常嘅心理反應。

不過，請留意一件事——唔好將「我今次考得未如理想」，變成「我係一個失敗嘅人」。

呢兩句說話，心理學上有好大分別。

一個係描述一件事；另一個，係否定自己。今日，請留意你同自己講緊乜。「我真係好無用」、「我令所有人失望」，呢啲其實係「無益嘅自我批評」。而「我對結果好失望」、「我而家好難受」，就係「自我同情」，理解而不是批判自己。

如果你今日好難受，請俾自己一點時間。食餐飯、飲杯水，照顧好自己，搵信任嘅人傾下，等情緒慢慢平靜，再諗下一步。

你可以對結果失望，但唔需要對自己失去希望。請唔好因為一張DSE成績單，而開始討厭自己。成績單只係反映你今次嘅表現，但唔代表你係點樣嘅一個人。唔緊要，慢慢嚟。因為你嘅人生，仲有好多可能。

如果你身邊有今日放榜嘅朋友，亦歡迎將呢篇分享俾佢。

有時，一句理解，比一句「加油」更有力量。

（題為編者所擬）