身子沉溺網絡 嚴父出奇招迫讀書 醒覺問題出於自己

「你對你個仔好似對寵物咁喎，你要佢乜都聽晒你話咁。」Patrick的兒子Michael自升上中學後成績一落千丈。Patrick因擔心兒子，用嚴厲高壓的方式迫他溫習，結果反而令Michael變得反叛，沉迷網絡遊戲，終日留連網吧，初中更多次留班，險些被踢出校。直到聽到社工上面這一句話，Patrick才發現原來問題出於自己，是他一步步令兒子沉溺網絡之中，其後決心改變。

▍ 嚴父出奇招迫兒子讀書：鎖wifi、安排全科補習

Michael升上英文中學後，因為要用電腦做功課，開始接觸網絡世界，被電腦遊戲吸引，日夜顛倒地打機：「嗰期成績差，情緒波動又大，成日同學校老師爭執，又留班。嗰陣幾乎無返屋企瞓，就係返學見社工，放學去網吧。」愛子深切的Patrick開始施出各種「奇招」：在兒子床尾貼「考試倒數日」、為防兒子通宵打機便將家中wifi上鎖、安排密密麻麻的補習等。

「當時就厲害啦，我諗我自己都頂唔順。除咗體育科，佢全部科都有補習。」Patrick怕兒子跟不上學習進度，便施加很多壓力在Michael身上。另一邊廂，Michael的媽媽採取縱容態度，父母因管教方式出現分歧，家人矛盾愈來愈大。同時，Michael與父親進入敵對狀態，缺席補習班，每日放學回家洗澡後便到網吧打機，吃杯麵當晚餐，早上再回學校。

▍ 父親：原來自己也「沉溺」變成魔鬼 徹底改變態度

「原來我都『沉溺』咗喺佢個沉溺入面，我變成咗魔鬼。」父子維持敵對關係一段時間，Patrick發現狀態僵持不下，決定向社工尋求協助，聯絡香港基督教服務處「網開新一面 - 網絡沉溺輔導中心」。社工Allen邀請Patrick加入家長組，進行工作坊和分享，Patrick逐漸發現問題出於自己。「Allen問我：『其實你有無諗過尊重佢？』嗰陣我醒一醒，原來我忘記咗佢係一個人，佢係我個仔。」

被社工點醒後，Patrick決定徹底改變自己的態度，不再強迫兒子去補習班，滿足自己的期望。「由今日開始，我唔會再安排補習班......倘若你認為有需要，我哋一定支持你。不如你嘅生活就交返俾你自己管理。」他又向兒子坦白自己已向網絡沉溺輔導中心求助，希望兒子能夠與社工Allen見面。

「我覺得成個人好似輕咗......壓力細咗好多，我嗰陣發現就算我成績差都唔會好大壓力。」爸爸的改變令Michael如釋重負，感受到父親的尊重和信任。雖然Michael仍然日夜打機，但他開始放下對父親的戒心，又向Allen敞開心扉。當時開始流行電子遊戲機，Allen說服Patrick在家添置一部遊戲機，「用一部機，治一部機」，至少可以令Michael留在家中打機，不再到網吧。

▍ 由沉溺足球遊戲到加入足球校隊

升上高中後，Michael雖然沒有去網吧，但仍日夜在家玩FIFA足球遊戲。「你喺呢度踢得咁過癮，你估你喺真實世界踢成點呀？」Patrick也意想不到這句說話能激發Michael離開遊戲，走到球場「踢街波」。Patrick看他對足球有與趣，便鼓勵他到青少年足球訓練學校，又推動他加入足球校隊。Michael果然熱愛足球運動，即使仍然喜歡打機，但也花了很多時間去足球訓練。又為了繼續留在校隊，開始注意自己的成績，盡量不被踢出校。

「我見佢打得咁過癮，我又打埋一份，先知道原來有啲遊戲係唔可以話停就停。」有一段時間，Patrick更和兒子一起玩槍戰遊戲，父子關係開始更加親密，Michael形容「好搞笑，兩個同學加埋我爸爸一齊打，好似朋友咁。」Patrick發現自己從前常常想方法「治」他，但其實「父母要相信自己嘅產品」，孩子有能力管理自己的生活。「我哋父母要做嘅嘢就係陪佢哋去經歷，例如喺球場陪佢（俾蚊）咬到豬頭咁......無論佢幾曳都好，其實都想有人去尊重佢。」

最終Michael順利完成中學課程，如今已經29歲的他，與父親就如老友一般，無所不談。離開中學後，Michael仍然熱愛足球，更曾經與朋友組隊參加本地比賽。他對爸爸說：「多謝你當初願意踏出一步去改變，令我哋嘅關係變好。」

Patrick父子的故事被收錄在香港基督教服務處的新書《我和我的孩子怎麼了：家中熟悉的陌生人》，服務處提供網絡沉溺支援服務達20年，期望這些真實的個案故事能夠讓大眾明白青少年成長的掙扎，也讓受網絡沉溺影響的家庭看見曙光。

文：Betsy